优惠论坛

标题: 《计数》（转载） [打印本页]

作者: iExcel 时间: 2012-12-5 01:45
标题: 《计数》（转载）
計數
“職業賭波”帶黎左好多回響, 多謝哂好多朋友既意見. 愚弟會加油.
Cxwong既問題, 我係icq已經答左佢. 呢度帶出左”計數”呢個問題. 當然, 呢度講既計數, 並唔係英文字calculate既意思, 而係statistics. 計數人, 即係stats佬. 究竟呢D賭野搵食既人同團體, 係咪就係一大堆stats佬呢?
師傅教落: 世界上所有人賭博既方法, 可以分為三大類:
方法A: 憑感覺或者喜好, 英文叫hunch. 英文有句說話: Get a hunch, bet a bunch.
用方法A既人, 你睇睇你身邊, 你應該會見到好多. 我以前同我係旺角攪生意仔果個老友, 次次問佢做乜買呢隻馬, 佢都會答我: “我覺得佢好囉”. 呢個係我好朋友, 我唔係話佢錯. 又去番一個人賭係為左過癮定係為左贏錢果個問題度. 請睇番愚弟好多個世紀前寫既劣作”幸運馬迷”.
用呢個方法既人, 好多時會為左買一個彩池或者一場馬而買馬. 我有個好朋友, 經常性地禮拜五打電話比我: “藍生, 我聽日想買條三串七, 有乜好野呀?” 其實係咪應該睇下自己有乜野心水, 至決定點買呢?
仲有其他特徵, 不過大家係自己身邊度搵搵啦. 應該好易理解, 唔講咁多.
方法B: 統計學, 英文叫statistics, 縮寫成stats. 任何同或然率或者值搏率有關既野都屬於方法B. Stats你可以話係common sense, 例如擲亳開公仔既機會有幾多. 我絕對唔係stats既專家, 有任何關於stats既問題, 請問cxwong. 我想講既係: 有好多人, 以為自己識得stats, 其實識屎. 亦即係話, 佢以為自己係用緊方法B, 其實佢係用緊方法A.
唔好怪佢地, stats真係一個唔容易掌握既科目黎. 好多stats佬都會墮入自己既圈套, 自己都唔知自己計緊乜. 我對stats既知識好有限, 唔會係度班門弄斧. 但係玩得賭博遊戲, 唔識唔得.
我有個朋友, 自己研究出賭馬既必殺方程式: 超級無敵三重彩二串一. 一年可以中好幾次, 話明T二串一, 中親梗係甘啦. 佢話呢個係經過無數數據分析, 反覆測試出黎既結果. 你信唔信?
假設我同你玩擲亳, 當然係fair coin(即係公同字係同等機會, 五十五十). 假如我開我連擲三個公既賠率係七倍, 你買唔買? 任何stats佬都一定唔會買, 因為佢地知道個outcome既fair value係八倍. 當然可能會有人照玩, 因為佢覺得”公”旺佢, 或者有其他無聊既原因. 佢甚至乎可能會贏錢, 但係從stats佬既角度, 佢係一個低能仔.
以上既遊戲, 應該唔難明. 試下呢個: 如果我連續擲亳五十次, 你係咁買我上面果個七倍(即係連買四十八次), 你估你會中幾多次?
我都要睇番我本stats書至答到呢個問題. Cxwong, 有時間同興趣既話, 請幫大家列出中一次, 兩次, 三次等等既機會係幾多. 但係我可以話你知: 你中起碼一次既機會, 係近乎百份百. 咁即係點?
我個朋友果條T二串一方程式, 佢唔可以因為一年中到唔止幾次, 就認為個方程式係成立. 就等於你玩我個遊戲, 中到幾次果個七倍, 就以為你打低左我, overcome左果個七倍. 係所有stats佬既眼中, 你依然係一個低能仔.
我呢個朋友, 佢以為佢用緊方法B, 其實佢係用緊方法A.
方法C: 任何心理因素, 或統計學以外既非無聊因素. 英文係psychological or motivational factor (or anything besides stats). 方法B係quantitative analysis, 方法C係qualitative analysis.
呢樣野, 你如果跑開馬既話, 你冇理由唔明. 王兆旦出好運贏家跑沙田A欄千六, 正面因素多到數唔晒: 馬好, 路程好, 騎師好, 戰意好, 唔贏就食硬蕉……… 但係我都係唔買, 因為有一個負面因素: 旦哥佢屎. 我中唔中係另外一件事, 但係我係用緊方法C.
方法C比起方法B難用, 因為係呢個層面係更加容易墮入頭先我提過果個圈套: 你以為你係用緊方法C, 其實你都係用緊方法A.
前幾日, 我同一個朋友飲野, 同佢提起谷草既檔位偏差問題. 我話: 報紙佬話果D近年谷草偏差情況日趨嚴重既理論, 其實係好荒謬. 根本一路以黎谷草呢方面既偏差都有, 亦都冇乜點變過. 變左既係D評分: D評分近年緊湊左好多, 少左好多有大量評分在手既馬係谷草度跑. 大家都無太多虛分, 環境同形勢就成為決定性既因素. 果時大家至發覺: 原來跑谷草, 一二三檔係好D既.
你可以話: 我點知我呢樣野係咪亂估架? 可能我宜家都係用緊方法A而唔係方法C呢? 請放心, 我唔肯定既話, 我唔會亂估. 估錯既話唔著數果個肯定係我, 我冇理由唔同一D靠呢D野搵食既人confirm一次先至信. 事實上, 我自己都做晒功課, 好多年前香港仲係成日跑谷草, 一個摩加利, 一個告東尼, 佢兩個靠呢樣野搵食都搵左好多年. 我D錄影帶唔係剩係要黎做紀念既.
錯用方法C既例子, 你打開任何一張坊間既馬經, 真係多到數唔晒. 連個練馬師生日都可以當係一個因素, 死未. 個練馬師都係人, 佢唔係上帝黎. 你當你係佢, 你都係返去office, 打開個馬房分廄表, 睇下自己D馬有冇分在手, 想交待定想贏杯賽, 再睇下黎緊既賽程表, 有D乜野好跑, 對手會係乜, 要唔要好分頭. 大倉就要諗有幾多新馬黎緊, 掃乜野馬好. 細倉就諗救亡, 仲有乜好諗. 操馬同狀態之類, 緊要既馬就自己黎, 其他就比副練黎. 我每次review一個馬房, 都係咁樣起步去諗, 唔敢講好理想, 不過自己都算滿意個效果. 但係我係個練馬師既話, 我就唔會諗自己就黎生日, 不如贏多兩場馬. 如果真係要用方法C去諗生日, 我根本諗唔到有人會因為自己生日而努力D做野, 反而因為生日而偷懶去玩既人就會有. 所以根據方法C, 個練馬師生日會冇野睇既機會應該會大D.
同方法B一樣, 方法C好多時都係common sense. 查實大家都明白方法ABC有乜野唔同, 但係好多時攪唔清楚自己係用緊邊個方法. 更甚既係係度自己呃自己; 為乜呢?
講番計數.
師傅, 究竟三種方法, 邊種最好? 有個預感, 師傅個答案會令我失望.
“冇肯定既答案, 贏到錢既方法就係好方法.” 唉, 你玩我咩. 咪住, 聽埋先.
“冇錯, 贏到錢既大有人在, 而你亦可以話, 佢地個個用既方法都係唔同既. 我未見過人純用方法B或者純用方法C可以長期贏錢, 全部都係方法B同方法C都用. 但係我肯定未見過有人可以用方法A而長期贏到錢. 另一個睇法係: 你成功與否係在於你點樣能夠靈活運用方法B同方法C.”
師傅既說話, 令我諗起我大學二年級果個stats教授.
佢係德國佬黎, 唔跟書教, 班鬼仔跟到死晒. 第一次測驗, 強如我咁唔讀書既人都只係拿到五十八分. 正諗住叉街之際, 原來佢話: 全班有五十分以上既人, 只係得四個, 原來係百五人裏面, 我考第三. 我左面, 右面同後面果三個鬼仔, 我冇記錯既話分別拿左八分, 七分同兩分. 果次測驗之後, 百五人死剩四十個. 好似玩緊大屠殺咁.
想講既係: 個德國佬教我既野, 我剩係得一樣野明. 佢話: “The power of statistics is: statistics changes uncertainty into certainty.” 勁.
又玩番擲亳遊戲. 我擲一次, 公同字既機會係均等, 五十五十. Statistics唔可以估到我會擲到公定係字. 呢D叫uncertainty非肯定.
但係如果我係擲亳擲一萬次, 我就可以好肯定咁話你知: 我會大約擲出五千次公, 五千次字. 依然唔知實際有幾多個公, 但係”肯定”有大約五千次, 唔會係一千次或者九千次, 雖然一千次同九千次都唔係冇可能. 呢D叫certainty肯定.
Statistics將擲亳既結果, 由非肯定變成肯定. 超勁.
仲記得有人問: 咁如果真係擲左九千次公出黎, 咁可唔可以話個亳子唔係一個fair coin? 佢答話: 有得計, 但係未教到果課, 講你都唔會明. 不過我會咁樣答你: 你唔好理statistics先. 如果我話呢個一定係fair coin, 而我真係擲左九千次出黎, 你信唔信個亳子真係一個fair coin? Do you believe?
DO YOU BELIEVE? 你信唔信?
呢樣野經常困擾著D stats佬, 見到D野, 要做一D假設(make assumptions), 都唔知信唔信好. 你見到某個路程某個欄某個檔位既數據好差, 係咪就要將果個檔既馬減晒分?
英文有個字叫causation, 係由個cause(起因)字果度變出黎, 通常係法律個層面會多D用呢個字. 所謂有果必有因, 任何現象一定要有plausible explanation(可理解及接受既解釋)先至可以考慮比個現象成立, 否則係法律上就會抱懷疑態度, 唔會盡信.
講返我個賭波朋友. 佢當然做勁多數據, 問題係佢睇邊D數據, 唔睇邊D. 例如有人會話聽日曼城作客車路士唔會贏(喂, 我作架, 舉例咋), 因為曼城近六十年作客車路士, 曼城非輸即和, 從未贏過. 佢一定唔會信, 因為佢會覺得幾十年前果幾場曼城對車路士, 球會就都係果兩間, 但係踢波果廿二件就同聽日落場果廿二件完全唔同, 冇理由會有關係. 兩隊波對賽成績佢一定會睇, 但係唔係咁樣睇. 又例如: 曼聯同其他隊既對賽成績佢一定會睇, 但係熱刺同其他隊既對賽成績佢就唔會點睇. 所以我話呢條友唔簡單.
佢究竟係咪計數人? 你話呢?

作者: 永远的远 时间: 2012-12-5 10:21
楼主是香港的吧，写的是粤语加繁体字

作者: 幸运博彩者123 时间: 2012-12-5 11:39
谢谢楼主分享。

作者: gongyulo 时间: 2012-12-5 15:26
看得很辛苦，要先翻译一下

作者: iExcel 时间: 2012-12-5 20:00
回复 3# 永远的远

回复 3# 永远的远

我是内地的，不是HK人。这是一篇转载自香港职业赛马人的文章，学习一下香港人的博彩理念长长见识也没什么不好。对于不懂粤语的朋友应该可以能看懂八成吧。

欢迎光临优惠论坛 (http://www.tcelue.com/)